च्युईंगम

च्युईंगम

च्युई म्हणजे चावणे. गम म्हणजे डिंक. वेगवेगळ्या झाडांचे चीक गोळा करून च्युईंगम तयार केले जाते. हे तयार करताना सुरवातीला डिंकाला जवळपास ११५० अंश सेल्सिअस उष्णता दिली जाते. त्यामुळे डिंकाचा घट्ट पाक तयार होतो. तो गाळला जातो. नंतर या घट्ट पाकात पिठीसाखर, मक्याचा रस, ग्लूकोज, खाण्याचा रंग, अन्न टिकवणारे पदार्थ मिसळतात. हे मिश्रण थंड करण्यासाठी ठेवले जाते. व त्याचवेळी त्या मिश्रणाला वेगवेगले आकार दिले जातात. पूर्वी चुईंगम रबरासरख्या चिकापासून बनवायचे. दुधासारख्या रंगाच्या या चिकाला चिकल असे म्हणत. मोक्सिको व मध्य अमेरिकेतील सॅपोडिल्ला नावाच्या झाडाच्या चीक त्यासाठी वापरत. पण आता चुईंगगम मेण, रबर व प्लॅस्टिक यापासून बनवलेल्या सिन्थेटिक गमपासून बनवण्यात येते. हा गम साखर व मक्याच्या द्रावात मिसळला जातो. मग तो कुकरमध्ये वितळवला जातो. हा द्राव रोलमध्ये घालून चपट्या वड्या करण्यात येतात. १९२८ मध्ये प्रथम याचे उत्पादन सुरु करण्यात आले.

एकदा का च्युईंगम चघळण्याची सवय लागली ती सुटणं कठीण असं म्हटलं जातं. त्यामुळं च्युईंगम चघळण्याचे फायदे तोटे जाणून घेणं तितकंच महत्त्वाचे आहे. गळ्याला पडलेली कोरड दूर करण्यासाठी काही च्युईंगम चघळतात.चॉकेलेटसारखं च्युईंगम विरघळत नाही त्यामुळं तासनतास ते चघळणं आणि च्युईंगमचे फुगे करत त्याचा आनंद घेणं अनेकांना आवडतं. अनेकजण काम करताना च्युईंगम चघळतात. कुणाशी बोलतानासुद्धा ते च्युईंगम चघळणं सोडत नाही. याचाच अर्थ असा की च्युईंगम जणू काही त्यांच्या आयुष्याचा एक भाग बनलाय.च्युईंगम खाणा-यांमध्ये सर्वाधिक संख्या ही लहान मुलं,प्रोफेशनल, क्रीडापटू, कॉलेज तरुण-तरुणी यांची जास्त असते.या कारणांसाठीही चघळतात. काहीजण तहान रोखण्यासाठी, थकवा दूर करण्यासाठी च्युईंगम चघळतात. खेळाडूंमध्ये च्युईंगम चघळण्याचं प्रमाण सर्वाधिक आढळतं. च्युईंगम चघळल्याने एकाग्रता वाढते असंही म्हटलं जातं. याशिवाय खेळताना स्फूर्ती मिळावी यासाठीही अनेक खेळाडू च्युईंगमचाच आधार घेत असल्याचं चित्र पाहायला मिळतं. याशिवाय काही जण तणाव दूर करण्यासाठी तर काही तोंडाची दुर्गंधी दूर करण्यासाठीही च्युईंगम चघळत असल्याचं आढळतं.

च्युईंगम चघळण्याचे वैज्ञानिकदृष्ट्या फायदे : एका संशोधनानुसार च्युईंगमचे फायदे वैज्ञानिकदृष्ट्या सिद्ध झालेत.च्युईंगम चघळल्याने बुद्धी तल्लख बनते आणि स्मरणशक्ती वाढत असल्याचंही समोर आलंय. च्युईंगम चघळताना कोणत्याही विषयावर प्रतिक्रिया देण्याची क्षमता दहा टक्क्यांनी वाढते असंही या संशोधनातून पुढे आलंय. इतकंच नाही तर च्युईंगम चघळण्याच्या प्रक्रिये दरम्यान मेंदूचे कमीत कमी आठ भाग कार्यान्वित होतात. मेंदूतील रक्ताभिसरण प्रक्रिया वेगाने वाढते ही बाबसुद्धा जपानी संशोधकांच्या अभ्यासातून उघड झालीय. याशिवाय ऍसिडिटीच्या समस्येतूनही च्युईंगमुळे सुटका होते. पचनक्रिया सुधारण्यातही च्युईंगमचा फायदा होतो.च्युईंगम चघळतानाचे आरोग्यदृष्टया फायदे च्युईंगम चघळणं ओरल हेल्थसाठीही उपयोगी असतं. दात आणि जबड्याच्या व्यायामासाठीही ते फायदेशीर ठरु शकते मात्र कोणत्या प्रकारचे च्युईंगम चघळता यावर ते अवलंबून असतं. शुगर फ्री च्युईंगम चघळत असाल तर तोंडात उत्तेजक स्वरुपाची लाळ तयार होते. यामुळं नवी स्फूर्ती मिळते. या लाळेत काही खनिजंही निर्माण होत असल्याने दातांच्या उत्तम आरोग्यासाठी ते फायदेशीर ठरतात.

च्युईंगम अतिसेवनाचे  तोटे : च्युईंगमचे जितके फायदे तितकेच त्याचे तोटेसुद्धा आहेत.त्यामुळं च्युईंगचे अतिसेवनसुद्धा आरोग्याला घातक ठरू शकतं. च्युईंगमच्या अतिसेवनानं दातांना धोका निर्माण होऊ शकतो. साखरयुक्त च्युईंगम चघळल्याने दात दुखण्यासारख्या समस्या वाढू लागतात. ऍसिड आणि फ्लेवरवाल्या च्युईंगममुळे दातांना धोका निर्माण होऊ शकतो. इतकंच नाही तर च्युईंगम चघळता चघळता ते चुकून पोटात जाण्याचीही भीती असते. यामुळं पाचन प्रक्रियेला धोका निर्माण होऊ शकतो. शिवाय यामुळं पोटाचे विकार जडण्याचीही शक्यता असते. त्यामुळं च्युईंगम चघळताना त्याचे फायदे तोटे याचा विचार करुनच त्याचे सेवन करा.

अनेकदा कपड्यांना च्युईंगम चिकटतो. एकवेळ कपड्यांवर पडलेले डाग जातील पण च्युईंगमचे डाग मात्र जाता जात नाही. तो काढण्याचा प्रयत्न आपण करतो पण फार काही यश येत नाही. हा च्युईंगम निघता निघत नाही. कपड्यांवर त्याचे काळे डाग राहतात. जीन्सवर च्युईंगमचे डाग जास्तच वाईट दिसतात.

तेव्हा तुमच्याही कपड्यांवर च्युईंगम चिकटला असेल तर तो कसा काढावा यासाठी काही खास टिप्स– कपड्यांच्या ज्या भागावर च्युईंगम चिकटाला आहे तिथे बर्फ ठेवा. बर्फामुळे च्युईंगम कडक होतो आणि सहज निघतो. तो घासून काढण्याचीही गरज भासत नाही.– दुसरा उपाय म्हणजे ज्या भागाला च्युईंगम चिकटला आहे तो भाग गरम पाण्यात बुडवा. यानेच्युईंग थोडा मऊ होईल. त्यानंतर ब्रशने हळूवार घासून तुम्ही तो  काढू शकता.– घरात हेअर स्प्रे असेल तर त्यानेही काही सेकंदात तुम्ही च्युईंगम काढू शकता. च्युईंगमवर हेअर स्प्रे मारला तर तो कडक होतो आणि लगेच निघतो.